Undankeppni Íslandsmóts 2020

Íslandsmót 501 er stærsta pílumót ÍPS á hverju ári og eru Íslandsmeistarar karla og kvenna krýndir ásamt Íslandsmeisturum í tvímenningi karla og kvenna. Íslandsmót 2019 var haldið fyrstu helgina í maí með sama fyrirkomulagi og hefur verið undanfarin ár. Íslandsmót 2020 mun hinsvegar verða með breyttu fyrirkomulagi og hér fyrir neðan koma helstu breytingar:

  1. Undankeppnir Íslandsmóts 2020 verða haldnar sunnudaginn 8. september 2019 í Reykjanesbæ, sunnudaginn 6. október 2019 á Akureyri, sunnudaginn 10. nóvember 2019 í Reykjavík og sunnudaginn 1. desember 2019 í Grindavík.
  2. 4 efstu karlar í hverri undankeppni komast beint inn í 32 manna útslátt Íslandsmóts 501 árið 2020 og sleppa við riðlakeppni. Eins komast 2 efstu konur í hverri undankeppni beint inn í 16 manna útslátt.
  3. Spilafyrirkomulag í undankeppninni er beinn útsláttur, best af 9 alla leið hjá konum og körlum. Raðað er í undankeppnina eftir stigalista ÍPS.
  4. Þeir aðilar sem tryggja sér þátttökurétt hafa ekki rétt á að taka þátt í fleiri undankeppnum enda hafa þeir þegar tryggt sér þátttökurétt.
  5. Eftir þessar fjórar undankeppnir verða 16 spilarar í karlaflokki og 8 í kvennaflokki sem sleppa við riðlakeppni og er þeim raðað eftir stigalista ÍPS inn í útsláttinn.
  6. Riðlakeppni Íslandsmótsins verður haldin áður en útsláttarkeppni fer fram. Riðlakeppnin er opin öllum sem ekki tryggðu sér þátttökurétt í gegnum undankeppnina og munu 16 spilarar í karlaflokki og 8 í kvennaflokki komast upp úr riðlunum og munu þeim vera dreift eftir meðaltali í riðlakeppninni á móti þeim 16 körlum og 8 konum sem raðað var.