![](https://i0.wp.com/dart.is/wp-content/uploads/2021/10/img_3559-scaled.jpg?fit=1920%2C2560&ssl=1)
Íslandsmótið í 301 fór fram helgina 16-17. október í aðstöðu Pílukastfélags Reykjavíkur. Einmenningur karla og kvenna var spilaður á laugardeginum og tvímenningur karla og kvenna á sunnudeginum. Mæting í mótin var mjög góð en um 70 manns gerðu sitt besta til þess að landa þeim titlum sem í boði voru um helgina. Það sannaðist einnig um helgina að pílukast er íþrótt fyrir alla en í fyrsta skiptið var einstaklingur í hjólastól sem tók þátt í mótinu. Pílukast er íþrótt sem vaxið hefur gífurlega síðustu misseri og hafa aldrei fleiri aðildarfélög verið innan ÍPS og ekki sér fyrir endann á þeirri fjölgun.
Það voru keppendur frá Pílukastfélagi Hafnarfjarðar (PFH) sem sigruðu í karla- og kvennaflokki í einmenning. Í karlaflokki sigraði Ástþór Ernir Hrafnsson kollega sinn úr PFH Vitor Charrua 7-4 í úrslitaleiknum en Ástþór, sem var að spila á sínu fyrsta Íslandsmóti í 301, sigraði nokkra öfluga keppendur á leið sinni að titlinum, þar á meðal Íslandsmeistarann frá því 2020 Friðrik Diego. Í undanúrslitum sigraði hann Grindvíkinginn Hörð Þór Guðjónsson og fagnaði síðan vel og innilega þegar hann sigraði úrslitaleikinn. Ástþór spilaði einnig best í riðlakeppninni sem fór fram fyrr um daginn og átti sigurinn svo sannarlega skilið.
![](https://i0.wp.com/dart.is/wp-content/uploads/2021/10/img_3554-edited-scaled.jpg?resize=640%2C853)
![](https://i0.wp.com/dart.is/wp-content/uploads/2021/10/img_3557.jpg?resize=640%2C853)
Í kvennaflokki var kunnulegt nafn á bikarnum en Ingibjörg Magnúsdóttir úr PFH varð Íslandsmeistari í 301 eftir sigur á Brynju Herborgu Jónsdóttur frá Píludeild Þórs 7-4. Ingibjörg var að vinna sinn fjórða Íslandsmeistaratitil í 301 í röð en hún sigraði fyrst árið 2018 og hefur haft tangarhald á bikarnum síðan þá. Á leið sinni að titlinum sigraði hún nýliðann Sóley Eiklund í 16 manna úrslitum, Petreu Kr. Friðriksdóttur í 8 manna úrslitum, Sólveig Daníelsdóttur í undanúrslitum og tapaði einungis einum legg á leið sinn í úrslitaleikinn.
![](https://i0.wp.com/dart.is/wp-content/uploads/2021/10/img_3541-edited-scaled.jpg?resize=640%2C853)
![](https://i0.wp.com/dart.is/wp-content/uploads/2021/10/img_3545.jpg?resize=640%2C853)
Á sunnudeginum fór síðan fram tvímenningur karla og kvenna og mættu 24 lið í karlaflokki og 9 lið í kvennaflokki. Spilaðir voru riðlar og fylgdi útsláttur í kjölfarið. Í karlaflokki sigruðu margfaldir Íslandsmeistarar þeir Þorgeir Guðmundsson PFR og Guðjón Hauksson PG en þeir sigruðu Matthías Örn Friðriksson PG og Björn Steinar Brynjólfsson PG 7-6 í skemmtilegum leik sem fór alla leið í oddalegg og áttu bæði lið pílur til þess að sigra.
![](https://i0.wp.com/dart.is/wp-content/uploads/2021/10/img_3586-edited-scaled.jpg?resize=640%2C853)
![](https://i0.wp.com/dart.is/wp-content/uploads/2021/10/img_3598.jpg?resize=640%2C480)
Í tvímenningi kvenna voru það Arna Rut Gunnlaugsdóttir PFR og Brynja Herborg Jónsdóttir Píludeild Þórs sem sigruðu þær Ingibjörgu Magnúsdóttur og Brynju Björk Jónsdóttur 7-5 í úrslitaleiknum. Þær stöllur Arna og Brynja voru að sigra sína fyrstu Íslandsmeistaratitla í tvímenningi kvenna og fögnuðu vel og innilega að leik loknum.
![](https://i0.wp.com/dart.is/wp-content/uploads/2021/10/img_3569-edited-scaled.jpg?resize=640%2C853)
![](https://i0.wp.com/dart.is/wp-content/uploads/2021/10/img_3572.jpg?resize=640%2C480)
Hægt er að skoða öll úrslit helgarinnar með því að smella HÉR
Upptaka frá beinum útsendingum Live Darts Iceland um helgina má finna á YouTube síðu Live Darts Iceland
ÍPS vill að lokum þakka öllum sem komu að mótinu á einn eða annan hátt og minnum á Stigamótshelgi sem fram fer helgina 6-7. nóvember í aðstöðu Pílufélags Reykjanesbæjar.